Asoc. Cult. "Segredos de Pantón"

Club de tiro con arco
"Os Irmandiños"

Hoxe temos o placer de entrevistar ao club de tiro con arco "Os Irmandiños", así agaredecemos a esta nova entidade deportiva do noso concello que permite descubrir e practicar este deporte en Pantón.

Grazas polo voso tempo e dedicación!

SdP: Para comezar, fálenos de como xurdiu o seu club. Quen tivo a idea? Hai tanta paixón por esta práctica en Pantón?
CTI: A iniciativa xurdiu dun grupo de xente con paixón polo tiro con arco e outro grupo con paixón por levar adiante ideas que aporten a mellorar a comunidade. Fai moito que Lee tiña na cabeza a creación dun club, pero a burocracia e a dificultade para levalo adiante era un obstáculo importante. Ó final xuntámonos 5 compañeiros, Lee, Jesus e Alberto, que son os grandes expertos en tiro con arco e por otra banda, Frank e Jaime que puxeron en marcha todo o tema burocrático e de xestión. En pouco tempo conseguimos poñelo en marcha cun éxito notable de participación. Temos que destacar que contar con todo un campeón de España é todo un aliciente para que todo sexa máis atractivo e fácil.

​

SdP: Todos vimos en películas a Légolas ou a Robin Hood empregar o seu arco. Fálenos deste deporte. É asequible esta práctica deportiva?
CTI: Para iniciarse, o club dispón de todo tipo de material, polo que os tiradores so teñen que pagar a cuota do club. Unha vez que se supera esa iniciación e que ese tirador está convencido de que o deporte lle gusta e quere seguir con esta práctica, pode empezar a comprar o seu propio material. Aquí depende de cada un, pero podemos encontrar arcos a partir de 70€ e material de protección
a partir de 30€. Temos varios socios que xa adquiriron o seu propio material en compras de segunda man, etc. Como di Lee, si che acaba gustando, nunca terás so un arco.

SdP: A día de hoxe tendes moitos membros na vosa entidade? De onde son?
CTI: A día de hoxe contamos cuns 30 membros recurrentes, todos eles son tanto da zona de Pantón, como Sober, Monforte, O Saviñao e ata de Quiroga. Temosque destacar unha gran afluencia de xente doutras nacionalidades: ingleses, holandeses, polacos, australianos, arxentinos, etc. Isto axuda en gran medida á súa integración na zona e dalles máis alicientes de participación e de actividades para o seu benestar.

Unha imaxe de Zeltia, ao carón do mar.

SdP: Tendes un adestrador? Será Lee Ramsdale, non? E como son os vosos adestramentos?

CTI: Temos varios adestradores ou monitores, está Lee evidentemente, pero tamén
Alberto, Jesus e Frank Ramsdale (o pai de Lee), todos eles exercen de monitores e ensinan a todos os socios a que a paixón polo tiro con arco creza con eles. Os adestramentos son por categorías, desde os que se inician na práctica e cos que os monitores pasan máis tempo para que corrixan a súa técnica, ata os que xa van mostrando un nivel e tiran xa en distancia de competición, ós que os monitores van corrixindo eses pequenos defectos ou problemas que lles ven, ademáis de preparalos para futuros eventos deportivos. Neste punto queremos destacar que nos formamos en tiro intuitivo, con arcos tradicionais, tanto en pista, tiro a dianas como en 3D, tiro a obxetos nun circuito natural, como pode ser un bosque. Temos clases todos os mércores de 18:30 a 21:00 e os domingos de 11:00 a 13:00.

SdP: Hai moitas competicións? E onde acostuman ser?

CTI: Tanto no ámbito galego como no nacional si existen unha gran cantidade de competicións, poderiamos decir que a partir de outubro, temos unha cada fin de semana. Fai un par de semanas Lee foi campión nunha no País Vasco, levando xa o nome d´Os Irmandiños con el. Aquí en Galicia, temos varios clubs na Mariña e na costa de Pontevedra, pero case non existen clubs nas zonas de interior, polo que esperamos ser un referente deportivo na zona.

SdP: Cóntennos cal é o esquema dunha competición de tiro con arco? Como vai o sistema de puntuación?

CTI: Nunha competición de tiro con arco tradicional e intuitivo, os participantes disparan un número determinado de frechas a varias distancias establecidas. Os arqueiros adoitan dividirse en roldas e os obxectivos poden ser dianas estándar ou elementos 3D, dependendo do tipo de torneo.
Sistema de puntuación: Cada frecha recibe puntos segundo a súa proximidade ao centro do obxectivo.
Nas dianas tradicionais, os puntos van dende o máximo no centro (10 ou 11 puntos) ata o mínimo nas zonas exteriores. Nos percorridos 3D, os puntos dependen da zona impactada na figura (por exemplo, 11, 10, 8 ou 5 puntos). O gañador é quen acumula máis puntos ao final de todas as roldas.